8 June 1997 Kahidlaw
(revised 26 April 2005)Ginbalon ko ang karantahon ka maya
nga nagasalang
ka anang pugad
sa sangka sanga ka talisay
sa may sapa
sa likod balay namon
agudto may inugbulong ako
sa akon kamingaw.
Ugaring
waay man ako nag-ayad
sa kanta ka maya
Hay nalipatan ko abi bitbiton
ang anang pugad
ang sanga
ang puno ka talisay
ang sapa
ka gang amon balay.
Dabuk
30 June 2000
(revised 26 April 2005)
Ginsilhig ko
ang imo pangako
kanakon
imaw sa mga laya nga dahon
sa amon ugsaran.
Sanda akon tipunon
sa sangka tumpok
kag tutudan
agudto ang aso
masamo sa hangin
kag ana isulat
sa panganod
nga giya lang ako
nagahulat kanimo.
nagahulat kanimo.
Indi Run Ako Pagpadaha-a Kang Kamingaw
13 July 2000 Indi run Ako Pagdaha-i kang Kamingaw
(revised 26 April 2005)
Indi run ako pagpadaha-a kang kamingaw
hay amo d’ya ang akon ginalakot sa kalo-kalo
kun ako mamahaw nga waay ikaw.
Kamingaw man ang ginadapli ko kun ugto
ang akon ginasubak sa tugabang ukon alugbate
nga aton kauna ginalaswa
kag saro naton ginahigop ang sabaw.
Pay kun gab-i
nga ako d’lang tulad mag-ayapon
masapnot gid sa tutunlan
ang maghanggop kang kamingaw
bisan ano pa kaduro kag kanamit ang panakut
bisan ano pa katam-is ang panghinunga…
Hay ang akon padalundon
luha man sa gihapon.
No comments:
Post a Comment