Old Poems

‘Indi Tanan nga Tamawo Nagapuyo sa Talon

10 August 1996 Indi Tanan nga Tamawo Nagaistar sa Talon

(revised 26 April 2005)

“Paning!

Uli run! Hinugay panughot-sughot sa talon

Ikabuol ‘kaw gani ka tamawo

Maan kanimo.”

“Insa, ‘Nay haw?”

“Ay! Waay ‘kaw kamaan?

Ang mga ginatago ka tamawo

Indi run gawa kauli

Pirahan pa ka adlaw, semana, bulan

Kun kaisa gani ginatuigan.”

“Ti, ‘Nay, kun amo

Si Tatay ginataratago man ka tamawo?

Laka lang mag-uli giya kanaton

Garing, daw waay man tana gapatalon.”

“Hay, Paning

Sa amo ka d’ya nga panahon

Indi tanan nga tamawo nagapuyo sa talon.”

Nadumduman ko si Juan Pusong

(Para Kay Tatay)

17 January 1998

(revised 26April2005)

Nadumduman ko si Juan Pusong

Ang ana pagpasimpalad

Imo ginpaunlan kanakon

Indi ko malipatan

Ang kabuhi ni Sandapal

Nga akon  gintandayan

Sa ramig kang gabii…

Katingalahan

Pay waay matak-an ang akon talinga

Sa pagpamati

Sa liwat-liwat nga istorya

Kang amaranhig

Nga nagapakalot ka anang likod

Kang tawo

Nga ginahukas-hukas ang ana pa-a

Kag mga mantiyaw

Nga nagapatupong sa puno ka doldol…

Tatay,

                        Ang imo limug

ang akon habol

                        Sa pagturog.